27 Maj 2012 10:34
Librin që e botoi në Shtetet e Bashkuara të Amerikës, poeti Fahredin Shehu e promovoi në Prishtinë. Sipas kritikëve, Shehu e ushqen mendjen dhe shpirtin e tij për gjeneratat që vijnë në formën e pastër esenciale të artit.
I botuar para disa javësh në New York, nga shtëpia botuese ‘Inner Child Press’, libri me poezi ‘Pleroma’s Dew’ i shkrimtarit Fahredin Shehu u promovua në Prishtinë. Në amfiteatrin e Shkollës Amerikanë në Kosovë, të premten u mblodhën njerëz të fushave të ndryshme të kulturës, midis të cilëve edhe këngëtarja e njohur Nexhmije Pagarusha. Ata erdhën aty për të dëgjuar deklamimin e poezive të Shehut në anglisht dhe në shqip, si dhe për të dëgjuar vlerësimet e kritikëve mbi poezinë e tij, por edhe për të dëgjuar përvojat e tij letrare.
Shkrimtari Daut Demaku foli për sakrifikimin për artin, apo si e quajti ai, vetëvrasjen në emër të artit, duke marrë dy shembuj. Një në letërsinë botërore dhe një në letërsinë e Kosovës. I pari është Xhojsi e i dyti Teki Dervishi. Në këtë mes, Demaku e futi edhe Fahredin Shehun.
“Për të arritur rezultate mbinjerëzore, mbi mesataren njerëzore, shkenca e madhe, krijuesit e mëdhenj, sportistët e mëdhenj kanë përdorur mjete stimuluese. Te Fahredini ka ndodhur një mrekulli sepse e ka njohjen që të gjitha ato rezultate që janë mbërritur përpara me stimulanse të quajtura drogë tash arrihen me meditim”, tha Demaku.
Ndërkaq, me një fjalë rasti u paraqit edhe Visar Korenica, i cili theksoi se Shehu mbetet qenësor, gati tradicionalist dhe elitist.
“I ushqyer nga të gjithat që gjeniu njerëzor ka krijuar në kuptimin shpirtëror: letërsia, Koanet e Zenit, Upanishadat, mjeshtrit sufi si Rumi, Ibn Arabi dhe të tjerët, kabalistët, transcendentalitët, teozofët, Thoreau dhe Khalil Gibran, Shehu krijon në mënyrë unike dhe përfaqëson letërsinë ashtu si Nënë Tereza i ofroi njerëzimit shpresën për një botë më të mirë”, tha Korenica.
Ai shtoi se përderisa në letërsi shumë është shkruar për iluzionin e fillimit (Gjeneza) dhe iluzionin e fundit (Apokalipsi), Shehu zgjedh të shkruajë për iluzionin e ‘Tash’ dhe ‘Këtu’.
Korenica theksoi se për Fahredin Shehun jeta është fenomen i jashtëzakonshëm, përderisa ajo është dashuri, proces i papërshkrueshëm, ndërsa vdekja është e çastit, ndodh shpejt dhe shkurt dhe nuk ka magji në të.
Sipas tij, Shehu mbetet i heshtur nga refuzimi aktual i skenës së varfër kosovare, përderisa ai e ushqen mendjen dhe shpirtin e tij për gjeneratat që vijnë në formën e pastër esenciale të artit, ku në shikim të parë është transcendentale, e lashtë dhe e përhershme.
E duke folur për pranimin që vendet tjera po ia bëjnë Shehut, Korenica tha se dashurinë që ai e ndanë ka vlera universale, prandaj pranohet gjithandej, i përkthyer në mbi 20 gjuhë dhe i përfaqësuar në çdo kontinent.
Të pranishmëve iu drejtua edhe vet autori, i cili nuk hezitoi edhe t’u përgjigjet pyetjeve të shumta.
